Erasmus+ QUARTZ loyihasining 4-koordnatsiya yig‘ilishi Samarqanddagi Turizm va Madaniy meros Xalqaro Ipak yo‘li universitetida bo‘lib o‘tdi

Erasmus+ QUARTZ loyihasining 4-koordnatsiya yig‘ilishi Samarqanddagi Turizm va Madaniy meros Xalqaro Ipak yo‘li universitetida bo‘lib o‘tdi

2025-yil 10–12-sentyabr kunlari Erasmus+ QUARTZ loyihasining 4-koordnatsiya yig‘ilishi O‘zbekistonning Samarqand shahrida joylashgan Turizm va Madaniy meros Xalqaro Ipak yo‘li universitetida (SRIUTCH) o‘tkazildi. Yig‘ilish davomida loyiha doirasidagi yutuqlar, muammolar va kelgusidagi vazifalar muhokama qilindi.

Birinchi kun KIUT tomonidan “18 oydan keyingi loyiha sharhi” (Hisobot) taqdimoti bilan boshlandi. Unda erishilgan bosqichlar, uchragan qiyinchiliklar va turli ish paketlarining holati haqida ma’lumot berildi. So‘ngra Dr. Christina Armutlieva tomonidan taqdim etilgan WP3 – VUMda o‘tkazilgan trening bo‘yicha hisobotda trening natijalari va ishtirokchilarning fikr-mulohazalari muhokama qilindi. SRIUTCH tomonidan taqdim etilgan “QA oraliq hisobotida” sifatni ta’minlash jarayonlari hamda yaxshilash zarur bo‘lgan jihatlar ko‘rsatib o‘tildi. CAU tomonidan “Disseminatsiya oraliq hisobotida” loyiha natijalari manfaatdor tomonlarga qanday yetkazilgani haqida ma’lumot berildi. Shuningdek, UbTUIT tomonidan loyiha veb-sayti va platformasi bo‘yicha sharh taqdim etildi.

Ikkinchi kun KIUT tomonidan moliyaviy boshqaruv bo‘yicha taqdimot bilan boshlandi, unda loyiha byudjeti va yaqin kelajakdagi moliyaviy ehtiyojlar muhokama qilindi. Dr. R. Betcheva tomonidan tashqi sifat kafolati bo‘yicha ekspert hisobotida loyiha sifatini baholash natijalari bilan bo‘lishildi. UNIVAQ tomonidan taqdim etilgan WP4 – Amalga oshirish rejasi kelgusida bajarilishi lozim bo‘lgan ishlar rejasini yoritdi. Bundan tashqari, barcha hamkorlar tomonidan kelgusidagi harakatlar rejasi yuzasidan muhokamalar olib borildi. SRIUTCH tomonidan o‘tkazilgan so‘rovnoma orqali ishtirokchilar yig‘ilishning tashkiliy darajasi va mazmuniga baho berishdi. Kun yakunida sertifikatlar topshirildi va umumiy suratga tushildi.

Uchinchi kun SRIUTCH tomonidan tashkil etilgan Samarqandning qadimiy shahar qismlariga sayohat va norasmiy tarmoq uchrashuvlari bilan yakunlandi. Yig‘ilish davomida moliyaviy boshqaruv, sifatni ta’minlash va axborot almashinuvi kabi muhim masalalar keng muhokama qilindi. Ishtirokchilar Erasmus+ QUARTZ loyihasini muvaffaqiyatli yakunlash yo‘lidagi o‘zaro hamkorlik, shaffoflik va oliy ta’limda turizm hamda madaniy meros sohasini rivojlantirishga bo‘lgan umumiy intilishlarini yana bir bor tasdiqlashdi.