2025-yil 28–29-may kunlari, “Ipak yo‘li” turizm va madaniy meros xalqaro universitetida “Sifatni ta’minlash bo‘yicha samarali siyosatning asosiy tamoyillari” mavzusida trening o‘tkazildi. Mazkur tadbir Yevropa Ittifoqining Erasmus+ dasturi doirasida amalga oshirilayotgan QUARTZ loyihasi asosida tashkil etildi. Trening xalqaro hamkorlik va salohiyatni oshirish orqali taʼlim sifatini yuksaltirishga qaratilgan.
Treningni loyiha koordinatori S. Samariddinov kirish so‘zi bilan ochib berdi. U o‘z nutqida QUARTZ loyihasining O‘zbekiston oliy taʼlim tizimidagi o‘rni va uning samaradorligini taʼkidladi.
Treningda professor-o‘qituvchilar, ilmiy xodimlar, strukturaviy bo‘limlar vakillari, talabalar hamda boshqa manfaatdor tomonlar faol ishtirok etdilar. Bu ishtirok universitetning taʼlim islohoti va sifatni oshirishga sodiqligini yaqqol ko‘rsatdi.
Trening quyidagi asosiy yo‘nalishlarni qamrab oldi:
- Institutsional sifat menejmenti tizimlarini tahlil qilish
- Yevropa tajribasiga asoslangan sifat nazorati mexanizmlarini joriy etish
- Akademik takliflarni strategik rejalashtirish
- Ilmiy tadqiqotlar va PhD dasturlarini baholash
- Talabaga yo‘naltirilgan o‘quv dasturlarini ishlab chiqish
- Guruh mashg‘ulotlari va amaliy topshiriqlarni bajarish
Tadbir davomida ishtirokchilar amaliy tajriba orttirish, bilim almashish, va sifatni taʼminlashda zamonaviy yondashuvlarni chuqur anglab olish imkoniga ega bo‘ldilar. Trening jarayonida nazariy bilimlar bilan birga interfaol mashg‘ulotlar ham tashkil etildi.
Mazkur trening O‘zbekiston oliy taʼlim muassasalarida sifatni taʼminlash tizimini yanada takomillashtirish yo‘lida muhim qadam bo‘ldi.
